خرج العداء المغربي، زهير طالبي، بتدوينة عبر حسابه على "فيسبوك"، لتوضيح الطريقة التي تم بها، إقصاؤه من المشاركة في دورة الألعاب الأولمبية "طوكيو 2020".
وكان طالبي، يستعد لتمثيل المغرب في ألعاب القوى بالأولمبياد، في مسافتي 5 آلاف و10 آلاف متر، قبل أن يتم استبعاده من طرف "وحدة نزاهة ألعاب القوى".
ومن خلال التدوينة، يبدو أن الجامعة الملكية المغربية لألعاب القوى، "وقعت في المحظور"، كونها لم تقم بالتنسيق بالشكل المطلوب، مع "وحدة نزاهة ألعاب القوى"، وهو ما تسبب في "استبعاد" العداء المغربي، ساعات فقط قبل دخوله منافسات 10 آلاف متر.
وكتب طالبي المقيم في الولايات المتحدة الأمريكية، حيث يُتم دراسته هناك، في تدوينة عبر حسابه على "فيسبوك":
"... هاد لعام ولله لحمد حاولت نحافظ على اللياقة ديالي بلا إصابات لمدة طويلة او معمرني شديت نهار راحة، وصلت لمستوى كبير لي وليت حاس براسي قريب للوقت المؤهل للألعاب الاولمبية، حاولت نقلب على ملتقيات كبار، كانو بزاف ديال تضحيات ولكن مهم عندي هو نوصل للنتيجة لي بغيت.
في بداية العام جريت توقيتات مشجعة حمسوني كثر، او في 14 ماي جريت الوقت المؤهل للألعاب الأولمبية في مسافة 10000m. فرحت بزاف. اولا حيتاش درت توقيت زوين لي لعام كامل أو انا كنخدم عليهـ وثانيا توقيت كيأهلني نشارك في الألعاب الأولمبية.
في نفس اليوم بزاف ديال الناس لي كيعرفوني باركو ليا او فرحو معايا. خاصة لي عرف شحال ديال تمارة كادوز علينا. من بينهم المدير التقني ديال الجامعة لي بارك ليا وطلب مني نجي في أقرب وقت باش نبدا البروتوكول ديال الالعاب الاولمبية، لي فيهم 3 ديال فحوصات ديال منشطات كل واحد يكون بعيد على لاخر بـ 3 أسابيع.
مهم أنا كما قلت ليكم هاد الحلم غيتحقق، خديت أقرب طيارة وكنت فلخر د شهر هنا في المغرب.
كان عندي موعد مع طبيب الجامعة لي شرح لي بلي راه ماشي مهم التوقيت المؤهل المهم هوا الشروط لي دايرة وحدة النزاهة الدولية. وبما أنني حالة استثنائية غير مقيم في المغرب بسبب الدراسة. تواصل معهم الطبيب و خبرهم بالحالة ديالي او بلي مبقاش الوقت باش نستوفي الشروط لي طالبين. فنفس النهار جا القرار ديالهم بالموافقة واخة متكونش ديك المدة ديال 3 أسابيع د الفرق. حيتاش المغرب صنفتو الاتحاد الدولي فـ'اللائحة A'. وفرضو عليه هاد شي.
انا مشيت فرحان او كنستعد بكل ما يمكن، في نفس الوقت حسنت التوقيت ديالي د 5000 أو 3000 متر فديك المدة . او تأهلت في مسافة 5000m. في هاد المدة درت فيها 4 ديال الإختبارات الخاصة بالمنشطات. يعني كلشي كيبان لي غادي مزيان، وصلت في التداريب لأحسن لياقة وكنت واجد جسديا ومعنويا. هدف لي بين عنيا هو ندوز مع الأوائل ونمثل المغرب أحسن تمتيل وخاصة نعيش الحلم ديالي.
يوماين قبل من سفرو لطوكيو، الطبيب د الجامعة جاه اتصال من نفس وحدة نزاهة ألعاب القوى كتسولو عليا، قاليا نصيفط ليه التذكرة ديال الطيارة ديالي حيتاش كيسوله عليا وهوا بغا يبين ليهم الحالة الاستثنائية ديالي وفنفس الوقت جاوني بزاف د الأسئلة ف راسي… مهم سافرنا وانا كل التركيز ديالي على أكبر سباق غنجريه ف حياتي نسيت هاد شي، اليوم (الخميس) كنفيق كنلقا الخبر ديال الاستبعاد ديالي من المشاركة حيتاش مكيناش مدة ديال 3 أسابيع ما بين فحص وفحص... بغيت غير نكون واضح أنا مكراهش نكون كنخضع للفحص كل سيمانة باش منطيحش فهاد شي لكن ماشي لحالة ديالي هاد الساعة. أنا هدرت مع المسؤلين ديال الجامعة وأكدوا ليا بلي دار مفجهدهوم وتصدمو بهاد الخبر لي تبدل في آخر لحظة، أكدوا بلي هاد شي ميتعاودش مرة أخرى حيتاش غيدخلوني في نظام مكافحة المنشطات باش لعب أي تظاهرة عالمية مؤهل ليها... أنا الحمد لله راضي بقدر الله ومؤمن باختبار الله عز وجل".
